നിലാവ്

ഏകാന്തമീ രാവില്‍...

എന്‍ അരികില്‍ വന്ന നിലാ ചന്ദ്രികേ...

നിന്‍ തൂവെണ് നിലാവെളിച്ചത്തെ

അറിയാതെ ഞാനിന്നു പ്രണയിച്ചു പോയി...

മൌനമായി നിന്നോട് ചേര്‍ന്നിരുന്നപ്പോള്‍

കൊതിച്ചുപോയി ഞാന്‍

ഈ രാത്രി പുലരാതിരുന്നെന്കിലെന്നു...

ഈ നിലാവകലാതിരുന്നെങ്കിലെന്നു...

ഈ മഞ്ഞില്‍ കുളിരുമ്പോള്‍

ഇരുളാലെ മൂടുമ്പോള്‍ ....

കൊതിക്കുന്നു ഞാനീ രാവില്‍ മൂകം...

നിന്‍ മാറില്‍ മയങ്ങാന്‍ മാത്രം.

പകുതിയില്‍ മുടങ്ങിയ ഒരു ചര്‍ച്ച

അലോരസമായ ഗള്‍ഫ്‌ ജീവിതത്തില്‍ അത്ഭുതകരമായ ഒരു സംഭവം. യോഗ്യതയില്ലാത്ത എനിക്ക് ഒരു മാസത്തിനു ഓഫീസ് സെക്രട്ടറി സ്ഥാനം ഏറ്റെടുക്കേണ്ടി വന്നു. എന്നെ സംബന്ധിച്ച് ഇത് ശരിക്കും ഒരു അത്ഭുതം തന്നെയാണ്. ലീവിന് പോയതായിരുന്ന സെക്രട്ടറി മോന്‍സി അച്ചായന്‍ എല്ലാ ഡോകുമെന്റ്സിന്റെയും ഫോര്‍മാറ്റുകള്‍ സേവ് ചെയ്തു വച്ചിരുന്നത് കൊണ്ട്, എനിക്ക് വലിയ ബുദ്ദിമുട്ടു അനുഭവിക്കേണ്ടി വന്നില്ല. അങ്ങനെ ആ കശേരയില്‍ പണിയൊന്നുമില്ലാതെ (ആ സമയത്ത് കമ്പിക്കു വര്‍ക്ക്‌ കുറവായിരുന്നു) ഇങ്ങനെ ചാരി ഇരിക്കുമ്പോഴാണ്, കമ്പനിയുടെ പേരില്‍ ഒരു ടേബിള്‍ കാലണ്ടെര്‍ സ്വന്തയായി ഡിസൈന്‍ ചെയ്താലോ എന്ന് ഒരു ബോധോദയം ഉണ്ടായത്. പുതിയതായി സ്വയം പഠിക്കാന്‍ ശ്രമിക്കുന്ന സോഫ്റ്റ്‌വെയര്‍ ഇല്ലസ്ട്രെടരില്‍ ഒരു പരീക്ഷണം കൂടിയാകുമല്ലോ എന്ന് കരുതി. അന്ന് തന്നെ റൂമില്‍ ഇരുന്നു സംഭവം റെഡിയാക്കി. സാമ്പിള്‍ രണ്ടു പേജ്. അത് കാണിച്ചപ്പോള്‍ ചില മേലധികാരികള്‍ നല്ല അഭിപ്രായം പറഞ്ഞു. അത് കൊണ്ട് ഞാന്‍ ബാക്കി കൂടി ചെയ്തു, ലാമിനേറ്റ് ചെയ്തു അട്മിനിട്രഷന്‍ മാനേജര്‍ക്ക് കൊടുത്തു, അദ്ദേഹം അത് ജെനറല്‍ മാനേജരെ കാണിക്കട്ടെ എന്ന് പറഞ്ഞു.

അടുത്ത ഒരു ദിവസം അട്മിനിട്രഷന്‍ മാനേജര്‍ എന്നോട് പറഞ്ഞു, ജെനറല്‍ മാനേജര്‍ക്ക് അത് ഇഷ്ടമായി അതിലെ ഫോട്ടോസ് കുറെ കൂടി നല്ലത് സെലക്ട്‌ ചെയ്യാന്‍ പറഞ്ഞിട്ടുണ്ട് അത് ചെയ്തോളു എന്ന്. എനിക്കും സന്തോഷമായി. ഒരു ലാഭവും പ്രതീക്ഷിച്ചല്ല, വെറുതെയിരിക്കുന്ന ഈ സമയത്ത് എനിക്ക് സോഫ്റ്റ്‌വെയര്‍ പഠിക്കാനും താല്പര്യം തോന്നി. ഞാന്‍ അങ്ങനെയാണ്, എന്തെങ്കിലും ടെക്നികല്‍ ആയി പഠിക്കാന്‍ എന്തെങ്കിലും അവസരം കിട്ടിയാല്‍ ഒഴിവാക്കില്ല. photography, videography, photoshop, coreldraw, video editing softwares(pinnacle, ulead, premiere pro, sony vegas) ms office, typing ഇതിലെല്ലാം ഒരു വിധം ഞാന്‍ പയറ്റും. ഇതെല്ലാം സ്വയം പഠിച്ചതാണ്, എന്റെ ചില സുഹൃത്തുക്കളും സഹായിച്ചിട്ടുണ്ട്. ഇതൊന്നുമല്ല ഇവിടുത്തെ വിഷയം.

അന്ന് ഓഫീസില്‍ ജെനറല്‍ മാനേജര്‍ ഉണ്ടായിരുന്നു. മുകളിലത്തെ നിലയില്‍ കോണ്ഫെരന്‍സ് റൂമില്‍, എന്ജിനീരുമാരും അഡ്മിന്‍ സ്റ്റാഫും എല്ലാമാടങ്ങുന്നവരുമായി കൂലങ്കഷമായ ചര്‍ച്ച നടക്കുകയാണ്. ഓഫീസ് ബോയ്‌ വന്നു എന്നെ GM വിളിക്കുന്നു എന്ന് പറഞ്ഞപ്പോള്‍ ശങ്കിച്ചാണ് ഞാന്‍ ചെന്നത്. മീറ്റിംഗ് കഴിഞ്ഞ് GM നെ കാണാന്‍ മറ്റൊരു സ്റ്റാഫ് റൂമിന് പുറത്തു കാത്തു നില്‍ക്കുകയാണ്. വാതില്‍ തുറന്നു കിടക്കുന്നത് കണ്ടു എത്തി നോക്കിയാ എന്നെ GM കണ്ടു അദ്ദേഹം എന്നെ അകത്തേക്ക് വിളിച്ചു. എന്ജിനീരുമാരും മറ്റും ടാബിളിനു ചുറ്റും ഇരിക്കുന്നുണ്ട്‌.GM എഴുന്നേറ്റു വന്നു എന്നെ മറ്റൊരു റൂമിലേക്ക്‌ വിളിച്ചു. ഞാന്‍ അദ്ദേഹത്തിന്റെ പുറകെ ചെന്നു. അവിടെ അദ്ദേഹവും ഞാനും മുഖാമുഖം ഇരുന്നു. എന്നും ഉച്ചത്തില്‍ സംസാരിക്കുമായിരുന്ന അദ്ദേഹം അന്ന് വളരെ സൌമ്യനായിരുന്നു. എന്നോട് ചോദിക്ക്, "കുമാര്‍, നമ്മുടെ കമ്പനി കുറെ കൂടി മെച്ചപ്പെട്ട രീതിയില്‍ മുന്നോട്ടു കൊണ്ടുപോകാന്‍..... കുമാറിന്റെ അഭിപ്രായം പറയു." ഞാന്‍ കൈ രണ്ടും ടാബിലേക്ക് ഊന്നി മുന്നോട്ടാഞ്ഞിരുന്നു, പറഞ്ഞു "സര്‍, സാറിനറിയാമോ നമ്മുടെ കമ്പനിയില്‍ എത്ര പേര്‍ പണിയെടുക്കാതെ, ഉറങ്ങി സാലറി വാങ്ങുന്നു എന്ന്...?" മലയാളം സംസാരിക്കുന്നത് പോലെയാണ് അമേരിക്കന്‍ പൌരത്വമുള്ള ലെബെനെസ് ആയ അദ്ദേഹത്തോട് സംസാരിച്ചത്. തൊഴിലാളികളുടെ മനസ് അറിയാവുന്ന അദ്ദേഹം, അതിനെ ചിരിച്ചു അവഗണിച്ചു കൊണ്ട്.."കുമാര്‍, ഞാന്‍ പറഞ്ഞത് കുമാറിന് മനസ്സിലാ................... " പെട്ടന്നാണ് മൊബൈല്‍ ശബ്ദിച്ചത്, ചൈന മോഡല്‍ ആപ്പിള്‍ ഫോണിലെ "snooze" ബട്ടന്‍ അമര്‍ത്തി, പകുതില്‍ നിന്നു പോയ ആ ചര്‍ച്ച മുഴുമിക്കാന്‍. എന്റെ വാക്കുകള്‍ക്കായി വെയിറ്റ് ചെയ്യുന്ന, ജെനറല്‍ മാനേജരെയും, എന്ജിനീരുമാരെയും, അഡ്മിന്‍ സ്റ്റാഫിനെയും പ്രതീക്ഷയിലേക്ക് നയിക്കാന്‍....

ഞാന്‍, വീണ്ടും തലയിണയില്‍ മുഖം പൂഴ്ത്തി കണ്ണുകളടച്ചു.......